Northland 30.10-1.11 Paihia-Cape Reinga-Paihia-Auckland

Am morgä am 10 isch mi Bös vo Whangarei witer nach Paihia gfahrä.

Whangareifalls

Womer dert nachäm Mittag si acho bini mit eirä wo ou im bös isch gsi chli ga Kajak fahrä ir Bay of Island. Mir si vo Inslä zu Inslä padlet bises het afa rägnä. Dr Räscht vom Tag bini no chli im Dörfli umägloffä und ha mis änglischä Buäch chli witergläsä (Sara bi imfau scho i Kapitel 8 aglang :-) )

Abästimmig in Paihia

Im Magic Bus hetmä dr Cape Reinga Trip chönä drzuä lösä u drum bini hüt am morgä am 7ni gstartet richtig 90-mile Beach.

90-Mile Beach

 

I ha genau dä Tag troffä wo heikel isch miter Ebbe u drum heimer genau pünktläch müässä abfahrä, so das sogar teil Lüt dr Bös verpasst hei! Mir si ar 90-Mile Beach nah ufä richtig Cape Reinga gfahrä u hei am Schluss no ufdä Dünä d'Sandborads fürägno :-)

Sandboarden

Het mega gfägt, mau abgse drvo dasi wahrschinli morn Muskelkater ha vom uf Dünä loufä u das dr Sand eifach überau glandet isch :-)

Cape Reinga

Cape Reinga sälber isch schlön gsi aber nid so speziell, haut sehr touristisch. Ufem Rückwäg simer no im Kauriforest gsi und im Kauri Kingdom (sonä risigi Kauriusstellig)

u no äs Fötäli äxtra für d'Sara :-) (Si si würkli nid sooo gross! :-) )

Hüt isch sonä richtigä Bös Tag gsi u i bi eigentli vom morgä bis am Abä nur im Bös ghocket für umä zrüg uf Auckland z fahrä.

Farmstay Hikurangi 24.10-30.10

Am Mänti am Morgä früäh hanimi allei ufä Wäg i Nordä gmacht, für dert ä Wuchä uferä Farm z schaffä. Nach x-Telefon und Stundä wartä bini äntli abgholt wordä und ufenä risä Farm cho :-) 2100 Kühä, 29 Ross und öpä 15 Hünd ( Irgendwo häts no einisch x-hundert Schaaf ga, aber di hani niä z gsicht becho)

Am Zischti isch de hiä äs grosses Race gsi u mir hei 2 Sofas i Pferdetransporter gladä und ä rissä Chüälbox mit Bier u si när losgfarhä u hei am Strassärand parkiert. D'Sofas si ufz Dach gwanderet u mir hei dr ganz Nami dert obä Rennä gluägt :-)

Mir si de no froh gsi simer dert obä gsi, wöu einä isch gredi näbäusä gfahrä und im Bach glandet, dä wär ziemli noch verbi! Zum glück ischim nüt passiert!

so luägtmä z NZ Autorennä :-)

Süsch hani geng chli Ross grittä und Traktor gfahrä :-) Hiä fragt niämer drna wasd chasch, da heissts eifach mach mau :-) u so bini mitämä rissä Traktor irgendwo allei ufem Fäld us glandet u ha eifach mau chli gmacht :-) Fägt aber no.so Traktor fahrä :-) u wi guät dasi cha rittä het eigentli ou niä öper interessiert, si heimer eifach mau dr Storm gä :-) Het ja scho viuverspröächend tönt :-)

Mis Feriärössli Storm

Am Wuchäänd hani mit a di Turnier chönä, u das isch ä richtigi Medaliäjagd hiä!!!Si hei hüt 9 Ross mitgno u hei im ganzä 16 Starts ga u morn geits nomau so witer!!! Isch sonä richtigi Rösselerfamilliä, da passi super hi :-)

Morn geits de wider mit däm "doofä" Bös richtig Nordä :-)

Pukakewa-Auckland 23.10

Hüt simer am Morgä ziemli schnäu z Auckland acho u hei z Auto dert am Flughafä abgä. Scho am morgä am 11 hets dert überau Fans ga wo irgendwiä id Stadt hei wöuä. Womer äntli äntli im Hostel si acho, heimer müässä feschtstellä dasmä für 55$ in Auckland arä Rugby WM nid viu cha erwartä :-) Nidmau äs Fenschter het üses Zimmer ga :-)

Go the All Blacks!!!

Am Abä heimer no mit öperäm abgmacht wo mitnis z Nelson isch ir Schuel gsi und das Wuchäänd ou z Auckland isch. Mir si chli dür d'Stadt gloffä ufder Suächi nachämä Bildschirm mit viu Stimmig :-) Aber a däm Tag isch Auckland sowiso imä Usnahmezuästand gsi!!! :-) D'Stimmig isch eifach hammer gsi überau :-) Mir si sogar no inä Fanzone inächo u hei dert dr ganz Abä verbracht. Wo du d All Blacks gwunnä hei isch d Höll los gsi :-)

Auckland

Raglan- Pukekawa 22.10

Mir si wider Variantä 2

gfahrä, aber leider hets widermau grägnet u mir hei üsi Wanderig när umä usgla. Ufem Wäg simer am "heiligä Bärg" verbicho, wo am Hang ä Friedhof isch u dert hei aui Auto ghupet wesi si verbigfahrä, für di Verschtorbnä z grüässä. :-)

Da ja am Sunnti Rugby Final isch heimer scho ziemli früäh und chli näbäussä afa luägä fürnä Unterkunft. Mir si umä mau uferä Farm glandet u hei dert när mau chli üsäs Züg zämäpackt...

...was da aus zämä chunt imänä Monet wemä äs Auto het :-) Aber mir hei schlussäntli aus verstouet ga, u hei dr Nami chli ful uf üserä Terassä verbracht. Wosi mi hei gfaragt was ig de no machi we d Sara hei göngi, u ig ha gseit ke Anig, heisi gmeint i söu doch ufänä Farm ga schaffä. Eigentli hani das ja mau wöuä aber isch ja sonä Sach mitä Arbeitsvisa, aber si hei när gmeint das sigi kes Problem weni nid meh aus 6 Stund schaffi. Auso heisimer ou scho gad äs Jöbli wöuä vermittlä, het aber du doch nid klappet dert. Aber i ha Gfallä gfungä a derä Vorstellig chli gaz schaffä u ha drum witer gsuächt u doch Tatsächläch öpis gfungä woni am Mänti hi cha :-) Gömer doch mau chli ufenä Farm :-)

Fotos folgen :-)

Coromandel Town- Waitomo 20.10 / Waitomo-Raglan 21.10

Wägäm schlächtä Wätter u dä ständigä Umplanigä, simer chli z früäh drannä gsi für richtig Auckland u drum heimer spontan no d'Westküstä i üses Reiseprogramm ufgno. Mir hei ghört das z Otorohanga z grösstä Kiwihuus söu si umä dert cha ga Kiwis beobachtä.

Mir si auso derthi gfahrä, aber meh aus 4 Kiwis und äs paar Vögu(voralläm Ente) hetmä nid viu gse. :-) Heinis da chli öpis anders vorgstellt :-) Mir si richtig Waitomo gfahrä und heinis umä mau vorgno z Zältlä, schliässli heimer hüt mau chönä di churzä Hosä alegä :-)




Mir hei uferä Farm, zwüschä Schaf und Chälbli üses Zäut ufgstellt und hei dert d Sunnä no chli gnossä :-)

D'Nacht isch du aber viu chelter gsi ausmer dänkt hättä :-)

Hüt nacherä sehr chaltä Nacht, simer du am morgä chli lenger blibä ligä (wos äntli isch warm wordä) Mir hei umä mau Variantä 2 gno u si ca.100 km ar Küstä na ufder Schotterpistä richtig Raglan gfahrä. Mir hei verschidnigschtä Ortä aghaltä, zum Bispiel a 2 verschidnigä Wasserfäll.





Z'Kwhia simer di schwarzä Dünä ga aluägä und hei ghofft das de gad Ebbä isch, wöu das wär so öpis wid Hot Springs uf Coromandel.



Aber leider heimer umä Päch ga und z Wasser isch scho umä am inächo gsi. Viläch häts no glängt wemer chli pressiert hättä, aber mir heis du när lasi, wöu denä wo dran si gsi hets öpädiä ihres Loch wider mit Meerwasser gfüllt. Womer z Raglan si acho hetsäch d Suächi nachämä Bett chli schwirig gstaltet, wöusi hiä aui äs verlengerets Wuchäänd hei u drum aui unterwägs si. Aber mir hei iz irgend sonä Kabinä imänä Holiday Park verwütscht.

Coromandel 18./19.10 Rotorua-Hahei-Coromandel Town

 Mir si uf diräktem Wäg richtig Coromandel Peninsula u si bis uf Hahei gfahrä. Dert hani vomänä chlinä Backpacker gläsä, aber dases de gad so chli isch hättämer scho nid dänkt. Das isch eifach bimänä eltärä Ehepaar dähei gsi, so 2 Doppelzimmer hei ga. Mir hei bi ihnä ir Chuchi chönä ga chochä, u sisch eifach sehr familiär gsi.

Surfer Beach

Gägä Abä heimernis ufä Wäg zur Hot Wather Beach gmacht womä bi Ebbe cha äs Loch i Sand grabä u när sprudlet warms Wasser ufä. Chum simer dert gsi hets wider afa rägnä wi us Chüblä und mir hei im Auto druf gwartet dases ufhört. Nach öpä arä halb Stund heimers ufgä u hei wöuä zrüg fahrä. Womer scho fasch im Backpacker si acho hets du wider ufghört u sisch wider schön blauä Himmel gsi, auso simer churzentschlossä zudä Cathedral Cove gfahrä.

Cathedral Cove

 Mir si 40min.gloffä bismer am Strand undä si gsi, aber leider hetmä nid chönä derdürloufä wägä Steischlag Gfahr. Isch aber glich no schön gsi dert :-) Nachäm Znacht heimer dänkt, mir chöntä mau „Lord of the Ring“ in änglisch luägä, wemer doch scho z Neuseeland si! :-) Isch aber sehr ä schwirigä Film gsi zum verstah wemänä uf dütsch nidämau kennt :-D Aber ha widermau ä Bildigslückä gfüllt :-D

Üsä Strandspaziergang womer am Morgä schnäu hei gmacht hetnis chli gweckt für üsi Witerfahrt. Äs git 2 Wägä wo nach Coromandel Town füährä, ä tereti Strass und ä Schotterpistä wo dürä Busch füährt. Mir hei natürläch „Variantä 2“ gno (vo irgendöperäm hani das äuä geerbt :-) ) und si zmittz dürä Busch gfahrä :-)


Kauriboum


Ufem Wäg heimer bidä Kauri Böim haut ga und si i di „Schlucht“ hinderä gloffä. Ufder Witterfahrt heimer no schnäu bimänä Wasserfall aghaltä.



Isch ä super schöni Strecki gsi, u z gholper hetsäch glohnt :-)

Womer zum Backpacker si cho wo schins söu di billigschtä Bett ha, simer chli skeptisch gsi, wöu aus sehr nobel usgseht. Äs het umä mau keni Bett me frei ga imänä Schlafsaal aber är hetnis äs Doppelzimmer billiger gä. Iz heimer mau ä Nacht fasch wi im Hotäl u das für 30$ :-)

Am Namittag einisch heimernis widermau iz Auto gsetzt und si no chli gägäz Nordkapp ufägfahrä, leider hets gheissä dasmä dert mit normalä Auto nid ufäsöu wes grägnet het u mir si eifach mau ga luägä solang d Strass no teret isch gsi. Colville isch sehr chli gsi für dases ufder Chartä glich no izeichnet isch gsi :-) äs het öpä 5 Hüser, ä Tennisclub, äs Cafe und äs „Tante Emma Lädeli“ ga :-)


Dr Tennisclub vo Colvill :-)


Mir hei äs Kaffi trunkä u si dr ganz Wäg wider zrüg gfahrä, d Landschaft isch aber super gsi! :-)

Üses super Zimmer het sogar ä Fernseh ga und drum simer am früächä Abä uf di doofi Idee cho dä azla. Irgendwiä heimer beidi ufzmau ke luscht meh ga us üsem Bett ufzstah und ga z chochä, drum heimer im Bett gässä wasmer hei ga und hei ganz ä fulä abä verbracht :-) Het aber ou mau guät ta mau chli allei z si u nid geng Lüt umdi z ha.

Matata-Rotorua 16.10.11/Rotorua 17.10.11

Nacherä doch nid sooo chaltä Nacht, wi dänkt, heimernis ufä Wäg nach Rotorua gmacht. Womer id Nöchi si cho , hetmäs relativ schnäu gschmöckt dasmer ufem richtigä Wäg si :-) Mir hei üses Züg im Backpackers deponiert u si witer ines Maoridorf (Whakarewarewa).



 Dert simer chli derdür gloffä u si no bidä Geysire verbi am Schluss heimer no sonä Maorishow chönä ga luägä. I ha no chli mit denä „Schwingbäueli“ mittanzet u när simer zrüg iz Hostel.



Dert heimer üsä Zimmergnossä immer no im Bett vorgfungä u drum simer när chli ga Pool spilä, hiä heimer wenigschtens mau unbeobachtet chönä üäbä :-D Isch du ou verhältnissmässig lang gangä :-) Iz steit de hüt Abä z grossä Rugby-game a!!! Australiä-Neuseeland - Go All Blacks!!!

All Blacks hei gwunnä geschter abä!!! Yea... :-D

Hüt isch üsä Plöischlertag, u drum heimer chli usgschlafä u si när gmüätläch dürnä Park mit thermischä Aktivitätä glofä.



Da mir ja nächscht Wuchäänd adä Finalspiel wärdä z Auckland si, heimernis iz nachem Finalizug natürli ono ufd Suächi nach T-Shirts müässä machä :-) Wei ja de schliässli chli ga fanä :-D Nachdäm dasmer dür z Zentrum vo Rotorua glofä si und z eintä oder anderä kouft hei, simer zrüg i Backpacker u i ha no dr Hotpool usteschtet. Isch super gsi aber für mini Verhältnis wider chli z heiss :-) I bi irgendwiä glich nid so hitzeresistänt wini gmeint ha :-D

Am Abä simer mau ga Natchos ässä, wosi hiä chli anders kennä aus diä wos bi üs git.

Napier-Taupo 14.10.11

Mir si am Morgä gad losgfahrä richtig Taupo, ider Hoffnig das z'Wätter hiä chli besser isch. Äs sich när du würkli nüm so schlimm gsi u mir si meh oder weniger trochä blibä. Mir si hiä zum 2. mau bimänä Backpacker wäggschickt wordä, wöusi am morgä am 11 scho usbuächet si gsi! Si het gmeint äs sigi im Momänt allgemein gad sehr viu los, hei aber du doch no äs Bettli gfungä :-)



Huka Falls



Bidä Huka Falls heimer schnäu äs paar Fötäli gmacht u heinis när ufd Suächi nachäm Strand gmacht wos söu warmi Quellä ha. Dä heimer leider niänä gfungä u drum simer när zumänä Bach gangä wo ou söt warms Wasser ha. Widermau heimer ufem Parkplatz d'Kollegä vor Sara troffä u si hei z glichä im Sinn ga wi mir, drum simer när aui zämä zu däm Bach gloffä. Dä isch du würkli warm gsi!!! scho fasch z'Heiss :-) Sisch gsi wi ir Sauna u mi het nidmau chalt ga wemä isch usä cho. Mir heis aber doch eigentli dr ganz Nami dert usghaltä, we ou nid immer im Wasser :-)



Hot Springs



Nachdäm mir widermau si ga Pizza ässä heimer no aui zämä abgmacht gha für ga z Bowlä :-) Leider het niämer gwüsst das z Neuseeland Bowling eigentli Botscha isch :-) Auso simer statt vorem Bowlingcenter vorämä Rasä gstandä :-D

De simer schlussäntli doch wider im Pub glandet :-)

Um Mitternacht heimer vodä anderä no äs typisch Neuseeländisches Dessert übercho, so richtig neuseeländisch süäss!!! :-) (Dr Namä heimeris um diä Zit nüm so genau chönä merkä :-) )

Taupo-Wakatane 15.10.11/Wakatane-Matata 16.10.11

 Eigentli het ja d'Sara hüt wöuä ga Skydive aber z Wätter isch umä mau zweni schön gsi für öpis z gsee u drum hei mir churzerhand entschlossä üsi 2 tägigi Wanderig vor z ziä u si uf Turangi gfahrä. Dert heisinis im I-side gseit dasmä das Tongarira Crossing im momänt nur gfüährt mit Stigisä und Pickel chöni machä, wöus scho di ganzi Wuchä schneit. Si hei schins di Wuchä scho 9 Lüt wo uf eigeti Fuscht si gangä müässä usäflügä :-) Das heimer du doch nid wöuä riskiärä, allei z ga. Di gfüärti Tour wär nur ei Tag gsi u de wärs öpä 8 Stund zum loufä gsi, mir hättäs lieber uf 2 Tag verteilt gmacht, drum hei mir üs du zum 2. mau umentschidä us si uf Whakatane gfahrä. No plan is the best plan!!! :-) einmal mehr!...

Vo dertus chamä ä eitägigä Usflug uf d'White Island machä das isch no ä aktivi Vulkaninslä. Mir hei ä Tour buächet (isch nur so mügläch) aber di hei vori gad aglütä u hei gseit dases no nid sicher isch dasmer morn chöi ga :-( Mir hei gad chli ä Pächstränä!!!

Mir hoffä iz eifach mau dases wenigschtens hiä klappet, wöu Neuseeland ohni ä Vulkan isch nid Neuseeland!!!

Mir hei hüt zum Znacht sogar äs Candle light dinner ga :-)

üses Candle light dinner :-)

hetnis dr Bsitzer vom Backpacker churzerhand zouberet :-D speziell für d' Skiwis :-) (Schwitzer Kiwis) Eifach chochä heimer säuber müässä aber är het geng schön si Sänf derzu gä :-)

Iz gömer umä mau i Kino üses änglisch chli ga verbesserä u hoffä, dass das morn klappet!

Äs het klappet!!! Mir hei hüt am Morgä z Telefon übercho dasmer am haubi 10i ufd Inslä usä chöi.

Äs het äs paar Lüt ga wo scho di ganz Wuchä hei gwartet, wägä däm sis öpä 30 Lüt gsi wo mit usägfahrä si.

White Island

Ufem Wäg zur Inslä heimer widermau feschtgstellt dases
 viu Lüt git wo trotz Seekrankheit ufenes Boot gö. D'Crew het sehr viu Tütli verteilt :-) Mir zwöi hei drfür d'Überfahrt zforderscht ufem Spitz ganz allei chönä gniesse :-) Mir si zwar öpä 3 mau unglöibig gfagt wordä obs üs no guet göngi, aber mir si ja verschont blibä :-)

D'Inslä het scho vo witem so usgse, wimesech dr Mond vorstellt. Mir hei Helmä und Maske übercho und si az Land gfahrä wordä. Dert hetmä du schnäu gwüsst wiso dasmä di Maske brucht.

:-D haha

 Mir si öpä 2 Stung miteme Guide ufder Inslä umägloffä. Är het üs müässä dr Wäg vorusloufä, wöus süsch gfährläch wär gsi,dasmä irgendwo dri abä gheit :-) Mir si ziemli noch az sprudlendä Wasser hi u si mängisch zmitz im stinkendä Rauch gstandä :-) Was erstundläch isch gsi, si di vilä verschidnigä Farbä vo däm Gstein.

Ufder Rückfahrt hets när öpis Zmittag gä, obwou mir wider zu dä wenigä hei ghört wo das überhoupt aglängt hei :-) Isch viläch ou besser gsi, wöu d'Rückfahrt isch öpä glich „Tütälaschtig“ gsi :-)

Dr Gstank voder Inslä heimer mit is Auto gno u si no chli witer ar Küschtä na ufä gfahrä. I ha di super Idee ga, dasmä di Nacht ja mau chönt Zäutlä :-)



Wättervorhärsag isch starchä Rägä und 9°! Das heimer aber ersch erfahrä wo z Zält scho gstangä isch... Di alt igsässnä Campeure hei scho z Gfühl ga si chönsäch iz amüsiärä, wi mir 2 Zäut ufstellä, aber chum heter sis Stüäli zwäggrichtet ga isch das Zaut scho gstangä :-D zfrüh gfreut!!! Mir heinis öpis Znacht kochet und hei när chli „Mühli“ gspielt. Aber scho gli hetsnis du i Schlafsack zogä, wöus doch nid ganz so warm isch gsi.

Kaikouro-Picton 10.10.11/Picton-Paraparaumu 11.10.11/Paraparaumu-Napier 12.10.11

Hüt am Morgä simer losgfahrä richtig Picton ir Hoffnig mir chöni de hiä idä Marlborough Sounds ga Kajakä. Womer aber z Picton si acho hets usgseh aus würds jedä Momänt cho Rägnä u drum si mir äs Stück wit dr Queen Charlotte Drive gfahrä.

Marlborough Sound

Dr Räscht vom Nami heimer z Picton im Zäntrum verbracht. Picton isch nid gad unbedingt ä Stadt zum Zit vertribä :-)

Am Zischti Morgä isch üsi Fährä uf Wellington gfahrä, u ar Sara ihrä Wunschtag het agfangä :-D

Te Papa

Z'Wellington hets leider, wi z'Picton ou, grägnet u drum hei mir beschlossä iz Te Papa (Schatzkiste)  z ga. Das isch sonä Art "Verchershuus" :-D. äs het verschidnigi Maorisachä dinnä ga und süsch so Züg über Neuseeland.

Civic Square

Wos du äntli ufghört het, simer chli dä Malls nachägangä und hei chli gschoppet.

Cable Car

Gägä Abä simer no mitem Cable Car gfahrä u dürä Botanisch Gartä zrüg id Stadt gloffä.

Wöu mir hei z Gfüäl gha, dasmer dert zmiz ir Stadt ke Parkplatz fingä für über Nacht, hei mir di "doofi" Idee ga no usder Stadt usä z fahrä. Mir hei nur mit Müäh und Not am 9i no ä Unterkunft z Paraparaumu (Name bedeutet soviel, wie "Reste aus dem Ofen") :-D gfungä

Wöu z' Wätter immer no nid besser isch, u mir üsi planeti Wanderig müässä verschiäbä wöus Schnee het :-( hei mir üsi Plän gändertet us si fang chli uf Napier :-) Best plan is no plan! mir si ja spontan :-)

Napier

Mir si di wunderschöni Art Deco Stadt chli ga aluägä u üsä Profi (Sara) hets ou nid so speziell gfungä,wi ig ou nid :-) äs isch chli kitschig, aber mir hei äs Schnäppli gmacht u hei iz äntli ä Kassettä für im Auto z losä. :-) Iz heimer de äntli Musig, dr Radio funktioniert ou ufder Nordinslä nid viu besser!!!

üsi ABBA Kassettä :-)

Mir müässä üs no chli a Verkehr ufder Nordinslä gwanä, hiä chuntmä definitiv viu weniger schnäu vorwärts wöus eifach viu meh Auto het u nid jedä weiss woz Gaspedal isch :-) u mi verfahtsäch viu schneuer wöus chli meh Strassä het...!

 

Dunedin-Waipara 8.10.11/Waipara-Kaikouro 9.10.11

Wo üsi Bettnachbarä äntli ufgstandä si, simer losgfahrä u gad Moeraki Bulders alugägä.

Moeraki Boulders

Moeraki Boulders

Dis si uf üserä längä Reis, scho ufdä erschtä 40 km cho, u drum heimer när dr Räst vom Tag mit Autofahrä verbracht. Mir hei müglächscht wit ufä wöuä cho u da mir üs gägä Christchurch entschidä hei, wöus dert schins immer no verwüästet usgseht, si mir när bis uf Waipara gfahrä. Das si im ganzä meh aus 400km gsi.

Wo mir du hei gse, womer i üsem hütigä Backpackers schlafä simer du chli überrascht gsi, aber heis no luschtig gfungä :-) Mir hei üsi Nacht imänä autä Güätherwagon verbracht :-)

üses Bettli :-)

Sisch sehr chaut gsi dert innä aber im Summer wär das sicher no gmüätläch. Leider hetz ou nüt gnützt, dasmer d'Heizig di ganz nacht uf Hochturä hei la loufä :-)

Wöu mir üs chli hei wöuä wermä u sowiso no äs Rugby game isch gsi, hei mir üs chli unter di Iheimischä gmischt im einzigä Pub vom Dorf. Dert si mir scho ufgfauä wöu jedä het gmerkt das mir nid vo da si :-)

Dr alt Bahnhof

Am Sunnti morgä hei mir voräm autä Bahnhofhüsli, schön ar Sunnä usä (dinnä isches viu z chalt gsi) Zmorgä gässä.

Mir si nach chlinä, nid erwähnenswärtä Umwägä, diräkt uf Kaikoura gfahrä, u dert aus erschts gad mau zum Abiäter für Dolphinwatching. Dert hei mir üs schnäu müässä entscheidä ob mir no hüt am Nami wei ga oder ersch morn am Morgä. Wöu z Wätter hüt super isch hei mir üs entschidä ä halb Stund speter mit z'ga.

Haha ke Komentar :-)

I ha mini ganzi Usrüschtig abghout u när simer iz Bösli gstigä wonis zum Boot het bracht. Am Afang bini chli skeptisch gsi obmer Delfinä gse, aber ufzmau sisi überau uftoucht womä het hi gluägt. Mit hei üsi Toucherbrüllä gno u si zuänä iz Wasser. Bi erstunt gsi wi zuätrouläch das diä si, di touchä ungädürä oder näbädran, isch mega cool gsi :-D Mir si im ganzä öpä 4mau iz Wasser u i ha mit mirä Unterwasserkamera no äs paar Fötäli versuächt z machä. Mau luägä ob öpis schlaus isch usächo drbi! :-)



Das 12 Grad chaltä Wasser (si heis öpä 3x erwähnt :-)) isch bis zu däm Momänt wod äntgültig bisch usächo, gar nis so schlimm gsi, wöumä geng mit denä Delfinä isch beschäftigt gsi, aber womer du när si usächo hani gmerkt dasi gar nüm gspürä :-) I ha gloub no säutä i mim Läbä so chalt ga! :-)

Ufder Rückfahrt heimersä du no vom Boot us chli gse.

Nacherä hissä Duschi im Backpacker bini du äntli umä chli uftouet :-)

Wo mir am Abä si ga di „wichtigschtä“ Spiel luägä, heimer im Pub usgrächnet Bärner atroffä. D'All Blacks si zum Glück witer cho, so das mir immer no d'Hoffnig hei ufänä unvergässlächä Abä adä Final Games in Auckland. :-)