Great Ocean Road 20.12.11-23.12.11

S isch wider früä losgangä u mir si zersch mau äs rächts Stück gfahrä bis i Grampiens NP. Dert simer ufänä "Bärg" ( ömu für australischi Verhältniss :-) ) gloffä womer ä super Ussicht hei ga :-)

Nachem Abstig simer no churz zumä Wasserfall glofä bevormer när zu üserä super Unterkunft si gfahrä. Dä Ort isch bekannt gsi das am Abä d Känguru iz Dorf inä chömä drum si d Marianne u ig no ufd Suächi nach denä :-) Mir heisä voräm Tennisplatz gfungä, sogar mitämä Jungä :-)

Am nächschtä Morgä simer am 7ni scho ga wanderä umä uf sonä australischä "Bärg" :-) D Ussicht het dismau nid chönnä mithaltä aber drfür heimer umä mau chli sport gmacht :-)

När simer äs ziemlächs Stück gfahrä bismer de uf di würklächi Great Ocean Road si cho.

12 Apostlä

Mir si scho mau zudä 12 Apostlä gfahrä u wemä het wöuä hätmä dert chönnä ga ä Heliflug machä, so öpis touristisches wi dert hani auso scho lang nüm gse, das isch äuä wi bi üs d Jungfrau! :-) Mir si zrüg ga Znachtässä u si när nomau usä gfahrä fürä Sunnäuntergang. äntli heimernä ou mau gse :-)

Dr letscht Tag isch nid so interessant gsi wöumer meh oder weniger nur Fotostops hei gmacht :-( Mir si no churz so dürnä Rägäwald gloffä u süsch heimer nid viu gmacht aus immer wider irgendwelchi Stränd gfötelät :-) Üs het diä Tour nid so gfauä wi di letschti, aber mit derä mitzhaltä isch haut schwirig gsi :-)

Outbacktour 14.12.11-18.12.11

Am Morgä simer am haubi 7ni abgholt wordä u si richtig Kings Cannyon gfahrä. Isch ä relativ längi fahrt gsi aber nachem Mittag simer när mau acho.

Kings Cannyon

Mir hei öpis gässä u si när ufä Cannyonwalk, so 4 Stund loufä bi denä Themperaturä hänkt auso schono a :-) Aber zum Glück hets ir Helfti mau äs Wasserloch gä womer hei chönnä ga badä :-) Womer si zrügcho, heimer äs Füürli gmacht und znacht kochet, när heimer dr ganz Abä umz Lagerfüür verbracht u hei chli versuächt Digeridoo z spilä :-) Womer si ga schlafä isch scho chli äs komisches Gfüähl gsi, imä Land wo so viu giftigi Schlangä und Spinnelä het, eifach nur so im Schlafsack dussä z schlafä, aber isch nur am Afang gsi, när isch gangä :-)

Am nächschtä Morgä isch wider ä längi Fahrt bis zum Ayers Rock Camp agstangä. Nachäm Zmittag simer du wider ga loufä, dismau zudä Olgas (Kata Tjuta), dert isches no viu heisser gsi u i hät niä dänkt dasmä i so churzer Zit soviu Wasser cha trinkä :-)

Kata Tjuta

Womer zrüg zum Camp gfahrä si für ga dr Sunnäuntergang am Uluru z luägä, hets afa rägnä und gwitterä. Mir si glich mit öpis z trinkä und chli Chips ufä Ussichtspunkt u hei dert äs gmüätlächs Apero ga :-)

Eigentli Apero bi Sunnäuntergang :-)

Womer am nächschtä Tag am morgä am 4i si ufgstangä fürä Sunnäufgang hets immer no grägnet u das isch du ou wider nüt wordä.

Uluru

Mir hei irgendwo bim Uluru zmorgä gässä u hei när dr Malawalk gmacht. Wos isch drum gangä dr Basewalk zmachä wo umä ganz Uluru geit, hei natürli di meischtä nüm wöuä ga wöus grägnet het.

Diä wo drumum si :-)

Mir hei när aber gseit mir wöui glich ga u si schlussäntli öpä z 7 gsi wo glich si gangä während di anderä 3 Stund im Bös gwartet hei :-) Mir hei ömu ä riesä Spass ga, s louft schliässli nid jedä im Wasser umä Uluru :-)

Wär louft scho so umä Uluru umä :-)

üsi Gruppä :-)

Dr Räscht vom Tag heimer mit fahrä verbracht u si nach 8 Stund in Coober Pedy acho. Dert hets no Pizza vom Kurier gä und ä Geburiturtä, de heimer dr ganz Abä chli Geburi gfiiret.

Coober Pedy isch sonäs Opalminä Dorf wo 70% vor Bevölkerig unterirdisch wohnä. Mir si am Morgä ga sones Huus aluägä und id Minä abä glofä bevormer säuber ufd Suächi nach Opalä si. Di meischtä hei gloub ou öpis gfungä und mitgno...wider so Steinä im Gepäk! :-/ Nacherä churzä Stadtrundfahrt, isch ja schliässli ou nid so gross :-), simer wider äs ziemlächs Stück ufd Flinders Range gfahrä. Dert heimer nomau Geburi gfiret (no immer nid dr letscht uf derä Tour :-) ) u i ha när ufem Dach vom Trailer übernachtet mit super Stärnähimmel u natürli gschützt vor denä Schlangä :-)

Mis Bettlli für ei Nacht :-)

Sunnäufgang vom Trailer us :-)

Nachem Zmorgä simer no z letscht mau ga loufä. Mir si inä Schlucht vor Flindersrange u nacherä churzä Fahrt mitem Bus simer ga Wii degustierä :-) Bevormer uf Adelaide inä si hets no viu chlineri Stops gä, eifach nur zum Fötälä :-) Da ja wider ä Geburi agstangä isch, simer am Abä no aui zämä ga chinesisch ässä u hei dr Abä irä Bar la usklingä.

Sydney 8.12.11-12.12.11

Mir si am am Donschtig hiä in Sydney acho u hei no z'letscht mau ufemä Camping übernachtet u vorauem heimer dr halb Tag Sachä zämäpackt :-)

Am Friti simer när am Morgä los u zmitz id Stadt inä gfahrä, u i ha mis Ziel erreicht u bi über d Harbour Bridge gfahrä :-)

Hmmm... was isch äch das fürnä Spur??? :-) Irgendwiä si dert nur Taxi gfahrä :-)



D Marianne liebt Chartäläsä :-)



Mir si när ga Auto putzä u tankä, bevormers öpä am 2 hei wöuä abgä. Da di liäbä Lüt aber nid gnau hei chönä agä womer das Auto müässä abgä, simer nur vorämä Showroom gschtangä u si üses Auto nid los wordä :-) Wieder a Flughafä müässimer hets gheissä, auso simer im Firabäverchehr wieder zmitz ussder Innästadt usägfahrä u sis dert ga abgä. Womer du äntli zrüg ir Stadt si gsi u üses Zimmer bezogä hei, heimer no mit öperäm abgmacht ga. Si hetnis no chli umägfüärt u när simer am Abä no miterä ga Nepalesisch ässä.



Sydney Harbour bi Sunnäuntergang



Da mir üsi weichä Bett so gnossä hei simer am nächschtä morgä chli später los aus süsch :-D Mir si chli dürd Lädä u heinis d Zit ir Innästadt chli vertribä. Am Abä simer i sonä legendärä Partybus, das gits hiä überau, aber mir si üs dert eifach völlig fähl am Platz vorcho :-D I bi ömu froh gsi womer umä si zrügg gsi!

Dr nächscht Morgä heimer natürli wider verschlafä, was aber nid witer schlimm isch gsi, wöus gschiffet het wi us chüblä. Mir si aber glich no chli a di früschi Luft u si nomau zum Operähus u iz the Rock Quartier. Gägä Abä simer när umä mau i Chino ga New Years Eve luägä, dr erscht Film in Australiä wo guät isch gsi :-)

Operähuus

Nacherä Nacht mit weni Schlaf (dank so rücksichtsvollä Franzosä, wo bis am 2 oder so hei Party ga im Zimmer) het dr Tag mit Teigwahrä chochä agfangä, wöumer no aus hei müässä usässä womer no hei ga :-) Isch ja schliässli dr letscht Tag ar Ostküstä u mir flügä witer nach Alice Springs :-) Mir hei üses Gepäck deponiert u si trotz Rägä no a berüämt Bondi Beach u hei dert chli d Zit ar Watherfront verbracht.

Bondi Beach

Nachdäm mir üses Gepäck si ga holä im Hostel heimeris ufä Wäg a Flughafä gmacht, womer widermau ä Nacht verbracht hei.