Golden Bay Weekend 16./17./18. September 2011

D'Sara u Ig hei für das Wuchäänd üses erschtä Auto gmietet u si am Friti nachder Schuel losgfahrä richtig Golden Bay. Das isch eigentli ä Gägend wo im Summer sehr touristisch isch, aber da hiä no Wintersaison isch hei mir eigentli aus für üs allei ga :-)

D Fahrt fürt zersch mau übernä "Pass" bis ad Küschtä. Wöu mir ersch am Friti Mittag losgfahrä si heimer vor Bucht no nid so viu gse ga. Mir hei äs originells Backpackers gfundä u hei am Abä ider "Dorfbeiz" no z Rugby game vodä All Blacks gluegt.



Farewell Spit



Farewell Spit

Am Samschti Morgä simer zum berüämtä Farewell Spit. Das isch winä längä Strand (32Km.) wo seeeehr windig isch. Dä vom Backpackers het üs am morgä no gseit mir söui vom Cape Farewell bis ad Wharariki Beach dä Cliff-walk machä.

Cape Farewell

z erscht mau üses neuä Gaschocherli usprobiert

Cliff-walk

Das isch ä super Sach gsi u äs hetsäch glohnt aber isch auso ganz schön asträngend gsi :-) zwüschinä hetmä auso fasch uf aunä vierä müässä ufächläterä :-) Drfür isch d Ussicht uf d Wharariki Beach super gsi u aui diä wo nur mitem Auto si higfahrä hei auso öpis verpasst!

Wharariki Beach

Typisch :-)

Gägä Abä simer richtig Takaka zrüggfahrä wöumer am nächschtä Tag no hei wöuä ä Abstächer i Abel Tasman Nationalpark machä.

Pupu Springs

Am Sunnti Morgä simer ziemli früäh scho unterwägs gsi u hei chli d'Morgästimmig bidä Pupu Springs gnossä. Mir hei zwar beidi chli meh erwartät ga, aber d Landschaft isch glich schön gsi :-) Da di Springs nid so wahnsinnig viu Zit hei brucht, simer relativ schnäu när witer zudä Wainui Falls.

ufem Wäg zudä Wainui Falls



Wainui Falls



Mir hei zum 2. mau a däm Wuchäänd üsi Treckingschuä fürägno u si zudä Fäll hinderä gloffä. Isch ä mega schönä Wäg gsi wo zmitz dürä Busch gfüärt het, Hängebrügg inklusive. :-) Eigentli heimer ja üsä Sunnti houptsächläch im Abel Tasman NP wöuä verbringä, auso heimer mit üsäm Mietauto di Schotterpistä i Agriff gno u si id Totaranui Bay gfahrä. Dr Strand isch zwar schön gsi mit däm ganz gälbä Sand, aber mi het dert iz eifach gad gar nüt chönä machä :-)

Totaranui Bay

Ir Awaroa Bay womer när no hi si heimer du no gmüätläch am Strand üs öpis z'Mittag kochet u si när wider zrüggfahrä. Uf derä Strecki heimer scho üsi erschtä erfahrigä mit Bachüberquerigä und Sand gmacht! :-) Aber mir hei das souverän gmeischteret :-D

Awaroa Bay

Isch äs super Wuchäänd gsi, u iz hoffämer das z nächschtä ou so wird.